Alislaam Juhudi za Kuleta uislam ndani ya maisha yetu
15. Usiombe dua kwa jambo lolote lisiloruhusiwa au kwa chochote kisichowezekana (kama mtu kuomba kuwa Nabi).
Imepokewa kutoka kwa Abu Hurairah (radhiyallahu ‘anhu) kwamba Mtume (sallallahu ‘alaihi wasallam) amesema: “Dua ya mtu itakubaliwa daima maadamu haombi kitu cha dhambi au kukata mahusiano ya kifamilia, na maadamu hana haraka (katika dua yake). ” Rasululla (sallallahu ‘alaihi wasallam) akaulizwa: Vipi mtu ana haraka (katika dua yake)? Mtume (Sallallahu ‘alaihi wasallam) akajibu: “Mtu husema, ‘Nimeomba dua na nimeomba, lakini sioni dua yangu inajibiwa.’ Kisha akachoka na akaacha kuomba.
16. Jizuie kutoa maelezo ya kina katika dua yako. Badala yake, unapaswa kuomba wema kwa ujumla.
Wakati mmoja, Abdullah bin Mughaffal (radhiyallahu ‘anhu) alimsikia mwanawe akiomba dua kwa maneno yafuatayo, “Ewe Mwenyezi Mungu (subhaanahu wata’aala)! Ninakuomba unipe kasri nyeupe lililo upande wa kulia katika Jannah nitakapoingia humo.” Aliposikia hivyo, Abdullah bin Mughaffal (radhiyallahu ‘anhu) alisema, “Ewe mwanangu! Muombe Mwenyezi Mungu (subhaanahu wata’aala) Jannah, na mwombe ulinzi wake kutokana na moto wa Jahannam, kama nilivyomsikia Mtume (sallallahu ‘alaihi wasallam)akisema, kutatokea kundi la watu katika Ummah huu ambao watavuka mipaka katika tahara (k.m. wudhu, ghusl) na katika kuomba dua.”
ادْعُوا رَبَّكُمْ تَضَرُّعًا وَخُفْيَةً ۚ إِنَّهُ لَا يُحِبُّ الْمُعْتَدِينَ ﴿٥٥﴾
Muombeni Mola wenu kwa unyenyekevu na kwa sauti ya chini, kwa sababu Mwenyezi Mungu (subhaanahu wata’aala) Hawapendi warukao mipaka.
